2017-05-24 02:38:50 | ژمارا خاندنا : 159 | كومێنت : 0 |

قارەمانیا ٢٦ی گولانێ یا تەپا پێ دەستپێکر



ب بەرهەڤبوونا بەرپرسێ لقێ١٨ و بەرپرسێن دامودەزگەهێن میری و حزبی و ل ژێر دروشمێ (بەلێ بو ریفراندومێ) ب پشکداریا چەندین تیما قارەمانیا ٢٦ی گولانێ یا تەپا پێی دەستپێکر ل یاریگەها بێناتا – قەدش  لرێکەفتی ٢٤-٥-٢٠١٧.

ل ژێر چاڤدێریا رێزدار (عمر ئورەیی) بەرپرسێ لقێ١٨ یێ پارتی دیموکراتی کوردستان و بەرهەڤبوونا چاڤدێرێ قارەمانیێ و (عەلی سپینداری) کارگێرێ لقێ بەرپرسێ نڤێسنگەها جەماوەری و پیشەیی و (محمد سلیم فیصل) بەرپرسێ لیژنا ناوچا سەرسنکێ و هژمارەکا رێڤەبەرێن دامودەزگەهێن میری و حەژێکەرێن وەرزشێ قارەمانیا (٢٦ی گولانێ) یا تەپا پێی ل یاریگەها بێناتا – قەدش ب راوەستان خولەکەک بێدەنگ ژ پیانڤە رێزگرتن بو گیانێ شەهیدان دەستپێکر و ل دویڤدا نمایشا کوردوسێن هەلگرێن ئالایێن کوردستانێ و پارتی و وێنێن بارزانیێ نەمر و جەنابێ سەروکێ هەرێمێ هاتە نیشاندان و تیمێن پشکدار ل نیڤا یاریگەهێ بەرهەڤبوون.

هێژا بەرپرسێ لقێ پەیڤەک پێشکێش کر و تێدا پێناسەک دا وەرزشێ و باس ل مفا وگرنگیا وێ کر ژ لایێن جەستەیی و دەروونی و جڤاکی و ئابوری، دیسان باس ل رەوشت و شیانێن وەرزشفانان کر.

بەرپرسێ لقێ دپەیڤا خودا گوت: وەرزش پرەکا هەڤگەهاندن و تێکەلیایە دناڤبەرا رەنگ و زمانێن جودا جودا. وەرزش ئێکە ژ توخمێن هێزا نەرم و برێیا وەرزشێ مللەت و گەل تێنە نیاسین و گروڤا وێ چەندێ نهو چەندین وەلاتێن کیشوەرێ ئاسیا و ئەفریقیا قوتابخانێن تایبەت یێن هەردوو یانەیێن ئسپانی (بەرشەلونە و ریال مەدرید) هەنە و ئسپانیا بویە قوبلگەهەک بو گەشتیارێن جیهانێ بو سەرەدانا یارگەهێن هەردوو یانا.

زێدەتر گوت:-  حکومەتا هەرێما کوردستانێ پانتایەکا مەزن دایە وەرزش و وەرزشڤانان سەرەرای رەوشا  نالەبارا دارایی و قەیرانێن فرە رەهندێن هەمەجور. و مللەتێ کورد د ململانەکا بەردەوام دا بویە دگەل دوژمنێن ئازادی و دیموکراسی و مروڤایەتیێ.

گرنگە گەنجێن مە هەردەم د حازربونێ دابن و لەشکەرەکێ رێک و پێک و خودان جەستەیەکێ ساخلەم و تژی شیان بن. و ل داویێ دەستخوشی ل ناڤەندا بالا و هەمی پشکداران کر و داخازا سەرکەفتنێ بو خاست.

پەیڤا لیژنا بەرهەڤکارا قارەمانیێ ژ لایێ ( محسن ئەرتیسی) بەرپرسێ ناڤەندا بالا ئامێدیێ یا ئێکەتیا لاوێن دیموکراتا کوردستانێ ڤە هاتە خواندن و تێدا سوپاسیا بەرپرسێ لقێ کر و تشیک خستنە سەر قارەمانیێ و تیمێن پشکدار.

( محسن ئەرتیسی) بەرپرسێ ناڤەندا بالا ئامێدیێ د لێدوانەکێدا بو مالپەرێ لقێ١٨ گوت: ل دویف پێشنیار و رێنمایێن هێژا عمر ئورەیی بەرپرسێ لقێ و ل ژێر چاڤدێری جەنابێ وی کو ب سوپاسی ڤە ب هەمی شیانان هاریکاریا مە کریە و ل دویف داخازا گەنج و لاوێن دەڤەرێ ئەم وەک ناڤەندا بالا ل ئامێدیێ رابوین ب بەرهەڤیێن پێتڤی بو رێکخستنا ڤێ قارەمانیێ، ل سنورێ لقێ١٨ و ناڤەندا ئامێدیێ (٣٠٠) تیم دێ پشکداربن و ل دەسپێکێ وەک قوناغا ئێکێ ل سنورێ هەر لیژنەکێ دێ ڤاڤارتن هێنە کرن و د ئەنجامدا (٨) تیم دێ گەهنە قوناغا دووێ کو یاریێن وێ دێ ل ئامێدیێ هێنە کرن و بریارە ل بەری جەژنا رەمەزانێ قارەمانی ب داوی بهێت و د رێورەسمەکێ تایبەت دا تیمێن سەرکەفتی دێ هێنە خەلاتکرن.








كومێنت (0)

  هه‌می مالك دپێتڤینه
ناڤ  
ئیمێل  
ده‌ق  
ده‌قێ نڤێسینێ دڤێت ژ ١٠٠٠ پیتا پتر نه‌بن - پیت یێن ماین