2017-05-07 02:24:39 | ژمارا خاندنا : 232 | كومێنت : 0 |

جەنازێ پێشمەرگێ دێرین (سەلمان بامەرنی) پێنج شەمبیا بهێت دێ گەهیتە کوردستانێ



دهێتە چاڤەرێکرن لروژا پنج شەمبی رێکەفتی ١١/٥/٢٠١٧ ل ناڤبەرا  دەمژمێر دوو و نیڤ تا سێ جەنازێ پێشمەرگێ دێرین و قارەمان مام (سەلمان حەجی مەحمود بامەرنی) ب گەهیتە فروکەخانا هەولێرێ و ب رێورەسمەکێ ژ هەژی بەرەف باژێرکێ بامەرنێ ب رێ کەڤیت و ل گورستانا بامەرنێ دێ هێتە ڤەشارتن ب ئامادەبوونا بەرپرسێن میری و حزبی و لەشکەری و کەسوکار و دوست و هەڤالان و جەماوەرێ دەڤەرێ.

ئه‌و قاره‌مان و دلسۆزێ ڕێبازا سه‌رخوه‌بوونێ یێ پتر ژ 70 ساڵێن ژیێ خوه‌ دایه‌ خه‌بات و به‌رخوه‌دانێ ل ڕوژا ٣ی گولانا ۲۰۱۷ێ ژ ناڤ مه‌ بارکر.

مام سه‌لمان به‌ری پارتی دیمۆکراتی کوردستان بێته‌ دامه‌زراندن ئه‌ندامێ پارتا هیوا بوو، هه‌ر ئێکسه‌ر پشتی پارتی لسالا 1946 هاتیه‌ دامه‌زراندن بوو ئه‌ندامێ پارتی.

 

(( کورتە ژیانا پێشمەرگێ قارەمان سلمان حجی محمود بامەرنی))

  • ل سالا ۱۹۲۷هاتیە سەر دونیایێ، ل باژێڕکێ بامەڕنێ سەر ب پارێزگەها دهوکێ. چار ساڵێن سەرتایێ دخوینیت و ژبەر کاودانێن ژیانێ دەست ژ خاندنێ بەردەت.
  • ل ساڵا ۱۹٤٤ێ قەستا بەغدا دکەت و بەشداریێ د کارێ چێکرنا فڕوکا و فێرکرن لسەر فڕوکەڤانیێ  دکەت و هەر دوی دەمی دا دبیتە ئەندامێ پارتی ڕزگاری کوردستان و هیوا و ژبەر بزاڤا وانا سیاسی دگەل حەفت هەڤالا دهێتە گرتن و زیندان کرن و پشتی دەمەکی دهێتە ئازادکرن.
  • هەر بەردەوام دبیت لسەر کارێ سیاسی و دساڵا ۱۹٤٦ێ پەیوەندیێ ب ڕێکخستنێن پارتی دیموکراتی کوردستان دکەت و دبیتە ئەندامەک چالاک دڕێزێن ڕێکخستنێ دا.
  • مام سەلمان ل ساڵا ۱۹٦۱ێ پەیوەندیێ ب شوڕەشا ئەیلولێ یا مەزن دکەت و دبیتە پێشمەرگە، لێ ژبەر نەبونا چەک و تەقەمەنیێ ژ دلسوزیا خوە، هەردوو گایێن خوە یێن جوتی دفروشیت و بخوە دەتە ب چەک و تەقەمەنی و تڤەنگا بەڕەڤانیێ دهاڤێتە ملێ خوە و دبیتە پێشمەرگەک چاڤ نەترس.
  • بارزانیێ نەمر د هەمان ساڵان دهێتە دەڤەرێ و مام سەلمان ژی پەیوەندیێ پێدکەت و دەمەک درێژ دگەلدا دمینیت و پشکداریێ دچەندین شەڕێن مەزن دا دکەت وەکە شەڕێ (مێرگا درێژ و زاویتە) و چەندین چالاکێن دی.
  •  هەر دگەل بارزانی دچیت بو دەڤەرا بالەکاتیێ و دەمەک درێژ ل وێرێ دمینت.
  •  لساڵا ۱۹٦۳ڤەدگەریتڤە بو دەڤەرێ و بەردەوام دبیت لسەر تێکوشینا خوە هەتاکو سەرقولێ وان یێ بناڤێ (جمیل توفیق) شەهید دبیت و ئەو جهێ وی دگریت و دبیتە ئامر مەفرەزە و د وان ساڵان دا، دشەڕێن مەزندا بەشداردبیت وەکە شکاندنا هێرشا جاشا بو سەر دەڤەرا بەرواری باڵا و چیایێ مەتینا و گەلەکێن دی.
  •  هەتاکو شکەستنا شوڕەشا ئەیلولێ۱۹۷٥ێ یێ بەردوام بوو لسەر خەباتا خوە.
  • لساڵا۱۹۷٥ێ پشتی شکەستنا شورەشێ ئەوژی دهێتە دورخستن بو باژێڕێ سماوە  ل ژێریا عێراقێ و هەتاکو ساڵا۱۹۷۹ێ لوێرێ دمینیت و پاشی ڤەدگەڕیت باژێڕکێ بامەڕنێ.
  • ل سالا ۱۹۸۰یێ دگەل خێزانا وی دهێنە زیندانکرن هەتاکو ۱۹۸۲ێ ل فەزیلیێ لبەغدا.
  •  ل سالا ١٩٨٢ێ دهێتە ئازادکرن و بمال ڤە دگەهیتە دەڤەرێن ڕزگارکری و لگوندێ بازێ دەڤەرا بەرواریا ئاکنجی دبیت و جارەکادی دگەهیتە ڕێزێزێن شوڕەشا گولانێ و چەکێ پێشمەرگایەتیێ دوبارە دهاڤێتە ملێ خوە و دبیتە بەرپرسێ ڕێکخراوا شەهید (جمیل توفیق) یا سەر ب لیژنا ئامێدیێ و ڕولەکێ مەزن دگیریت.
  •  د چەندین داستانادا پشکدار دبیت وەکە (کانی ماسێ، مەتارا بامەڕنێ ) و گەلەکێن دی.
  • پشتی ئەنفالێن ڕەشێن ۱۹۸۸ئەوژی وەکە هەمی کوردەکی کوچبەر دبیت و بەرەڤ دیاربەکرێ دچن و لخیڤەتگەها وێرێ ئاکنجی دبیت.
  • لدەستپێکا ۱۹۹۰ێ مام سەلمان بەرەڤ وەڵاتێ سوێدێ دچیت ب خێزان ڤە لوێرێ ئاکنجی دبن و مافێ پەنابەریێ وەردگرن
  • لساڵا ۱۹۹٤ێ ڤەدگەڕیت بو کوردستانێ و حەز دکر جارەکادی لسەر ئاخا پیروزکوردستانێ ئەوا چەندین ساڵان خەبات و تێکوشان بو کری ئاکنجی بیت، لێ مخابن نەخوەشیەک لێ پەیدا دبیت و جارەکادی مەجبوردکەت کو وەڵاتی بجه بهێلیت و قەستا غەریبییا بکەت و بزڤریتە ڤە سوێدێ.
  •  دگەل ڤێ نەساخیێ خوەڕاگریەک مەزن کر هەتاکو ل ڕوژا ۳ گولانا ۲۰۱۷ێ مالئاڤایی کری و خاتر ژ کەس و کارا خاستی.
  • سڵاڤ ل گیانێ پاکێ پێشمەرگێ قەهرەمان و تەڤایا شەهیدێن کوردستانێ.

رزگار کێستەیی پێشمەرگە و کادر و هەلبەستڤانێ بەرنیاس دبێژیت:- من ئه‌و شانازی هه‌بوو کو ل نیڤا سالێن 1980 یان بۆ ده‌مێ چه‌ند ساڵه‌کا ئه‌ز و خالێ سه‌لمان لسه‌ر ده‌مێ شورشا گولانێ د هه‌مان گرۆپی دا پێشمه‌رگه‌ بووین ل سنوورێ لژنا ناڤچا ئامێدیێ. ئه‌و به‌رپرسێ ڕێکخراوا شه‌هید جه‌میل توفیق بوو و ئه‌ز ژی کادرێ سیاسی-ریکخستنیێ هه‌مان ڕێکخراوێ بووم. ئه‌ز د وان ساڵان دا گه‌له‌ک سیفه‌تێن پاک و جوانێن کوردایه‌تی و شوڕشگێڕی ژ خالێ سه‌لمان فێر بووم و وی هه‌رده‌م وه‌ک خارزایه‌کێ خوه‌ یێ بچووک دانوستان لگه‌ل من دکر. من گه‌له‌ک بیره‌وه‌ریێن جوان لگه‌ل هه‌نه‌ کو دێ د نێزیکدا د په‌رتووکا بیره‌وه‌ریێن منێن شورشێ دا به‌لاڤ بن

ئه‌و کوردپه‌روه‌ره‌کی مه‌زن و پێشمه‌رگه‌یه‌کی قاره‌مان و پڕی سیفه‌تێن جوامێریێ بوو.

گۆرا خالێ سه‌لمان ب گول و گولاڤ به‌

گیانێ وی ل بهه‌شتێ شاد به‌

سه‌ره‌خۆشیێ ل مالباتا وی و هەمی کەسوکار و هەڤال و دوستێن وی دکەین. جهێ وی بەهەشت بیت و خودێ هەدار بدەتە هەمی لایەکی. (انا لله و انا الیه راجعون).








كومێنت (0)

  هه‌می مالك دپێتڤینه
ناڤ  
ئیمێل  
ده‌ق  
ده‌قێ نڤێسینێ دڤێت ژ ١٠٠٠ پیتا پتر نه‌بن - پیت یێن ماین