2017-04-25 07:30:20 | ژمارا خاندنا : 192 | كومێنت : 0 |

وه‌زاره‌تا پێشمه‌رگه‌: بۆمبه‌بارانا تركیێ نایێ قه‌بوولكرن..بلا (پ.ك.ك) ئێدی نه‌به‌ سه‌ده‌ما نەئارامیێ


وه‌زاره‌تا پێشمه‌رگه‌ ده‌ربارێ بۆمبه‌بارانا فرۆكه‌یێن شه‌ر یێن تركیێ ل چیایێ شنگالێ ده‌ گۆت; “بۆمبه‌بارانا فرۆكه‌یێن تركیێ نایێ قه‌بوولكرن.”

ده‌ربارێ ئێریشا ئەسمانی یا فرۆكه‌یێن تركیێ یا لسه‌ر چیایێ شنگالێ وه‌زاره‌تا پێشمه‌رگه‌ یا هه‌رێما كوردستانێ داخویانیه‌ك وه‌شاند و راگهاند; “ده‌مژمێر 02.00ێ دانێ سبێ یا رۆژا سێشه‌مێ 25-04-2017, چیایێ شنگالێ و ده‌ردۆرا وی ژ ئالیێ فرۆكه‌یێن شه‌ر ئێن تركیێ ڤه‌ هاتیه‌ بۆمبه‌بارانكرن. د ئەنجامێ ده‌ زیان و وێرانكاریه‌كه‌ مه‌زن چێبوویه‌, 5 پێشمه‌رگه‌ شه‌هید بوونه‌ و 9 پێشمه‌رگه‌ ژی بریندار بوونه‌.”

وه‌زاره‌تا پێشمه‌رگه‌ د داخویانیا خوه‌ ده‌ دیار كر; “شه‌هیدبوونا پێشمه‌رگه‌یان جهێ دلئێشیه‌كه‌ مه‌زن و بۆمبه‌بارانا فرۆكه‌یێن تركیێ ژی نایێ قه‌بوولكرن.”

د داخویانیێ ده‌ هاته‌ گۆتن; “ئەڤ پرسگرێك و گرفت د ئەنجاما هه‌بوونا (پ.ك.ك) ێ یا ل ناڤچه‌یێ رووددن. هه‌بوونا وان ژ بۆ گه‌لێ ناڤچه‌یێ و یێ هه‌رێما كوردستانێ دبه‌ سه‌ده‌ما سه‌رێشی و پرسگرێكان. ژ هه‌موو ئالیان ڤه‌ ژی گه‌له‌ك جاران داخواز ژ وان هاتیه‌ كرن دا كو چیایێ شنگالێ ڤالا بكن. لێ گوه نه‌دانه‌ ت كه‌سان.”

د داویا داخویانیێ ده‌ وه‌زاره‌تا پێشمه‌رگه‌ داخواز ژ (پ.ك.ك) ێ دكه‌, كو هێزێن خوه‌ ژ شنگالێ ڤه‌كشه‌ دا كو نیشته‌جهێن هه‌رێمێ بكارن د ناڤ ئارامیێ ده‌ بن.








كومێنت (0)

  هه‌می مالك دپێتڤینه
ناڤ  
ئیمێل  
ده‌ق  
ده‌قێ نڤێسینێ دڤێت ژ ١٠٠٠ پیتا پتر نه‌بن - پیت یێن ماین