2017-09-10 01:54:02 | ژمارا خاندنا : 128 | كومێنت : 0 |

پەیاما لقێ ١٨ ب هەلکەفتا (٥٦)ـەمین سالڤەگەرا شوەرشا ئەیلولێ


ب هه‌لكه‌فتا سالڤه‌گه‌را شوره‌شا ئه‌یلولێ یا مه‌زن کو ئەڤ سالە هەڤدەمە دگەل پروسا بانگەشا ریفراندوما سەربخویا کوردستانێ، ب ناڤێ لقا١٨ و جه‌ماوه‌رێ ده‌ڤه‌را ئامێدیێ گه‌رمترین پیروزباهیان ئاراسته‌ى جه‌نابێ سه‌روك بارزانى و سه‌ركردایه‌تیا پارتیا مه‌ پارتى دیموكراتى كوردستان و مالباتێن سه‌ربلندێن شه‌هیدان و هه‌مى پێشمه‌رگێن ڤێ شوره‌شا مه‌زن و پێشمەرگێن ئەڤرو بەرسنگێ داعش گرتی  وته‌ڤایا گه‌لێ كوردستانێ دكه‌ین.

به‌رى (٥٦) سالا دناڤ ره‌وشه‌كا پر ئالوزى یێن ناڤخو و ده‌رڤه‌ دا ل (١١/٩/١٩٦١)ێ ب رێبه‌رى و سه‌روكاتیا سه‌ركردێ مه‌زن (بارزانیێ نه‌مر) و ب سه‌ركردایه‌تیا پارتى دیموكراتى كوردستان، ئێكه‌مین چریسكا شوره‌شێ هه‌لبو وه‌ك به‌رسڤه‌ك ژبو سیاسه‌تا چه‌وساندن و ته‌په‌سه‌رى و هه‌وێن قركرنێ كو دهاتنه‌ په‌یره‌و كرن ژلایێ داگیركه‌رێن كوردستانێ ڤه‌ ب دژى خه‌لكێ وێ یێ سڤیل و بێ گونه‌هـ، ل ده‌مه‌كى كو دوژمنێ گه‌لێ كوردستانێ ئه‌ڤ چه‌نده‌ هزر نه‌دكر، و دخه‌یالا واندا بو كو ل ده‌مه‌كێ كورت ئه‌و دێ هه‌مى ده‌نگێن ئازادیخوازێن كوردستانێ هێلنه‌ بێ ئیراده‌ و بێ ده‌نگ، كو ئه‌ڤه‌ ژى دیار بو هه‌ر پشتى ده‌مه‌كێ كێم ب هه‌لبونا ئاگرێ شوره‌شێ كو خه‌لكێ كوردستانێ ب هه‌مى پێكهاتێن خو یێن نه‌ته‌وه‌یى و ئاینى و جڤاكى قه‌ستا شوره‌شێ كرن و ل دور رێبه‌رى و سه‌ركردایه‌تیا وێ كومڤه‌بوون و هه‌ر ل ده‌مژمێرێن ئێكێ یێن شوره‌شێ دا دوربێن مه‌زن و كوژه‌ك داوه‌شاندنه‌ هێزێن دوژمنى. ئه‌ڤ شوره‌شه‌ دهێته‌ هژمارتن ب مه‌زنترین شوره‌ش د دیروكا هه‌ڤچه‌رخا گه‌لێ كوردستانێ دا، شوره‌شا ئەیلولێ‌ ل ده‌مه‌كێ كورت دا شیا پتریا ڤێ پارچا كوردستانێ ل بن ده‌ستێن دوژمنێ داگیركه‌ر  رزگار بكه‌ت و ئیدارا  شوره‌شێ ب شەهده‌یا هه‌مى چاڤدێرێن سیاسى وه‌كى حكومه‌ته‌كێ رێڤه‌به‌ریا خو دكر ژهه‌مى لایه‌كێ ڤه‌ و ئه‌ڤه‌ جارا ئێكێ بو هه‌مى خه‌لكێ كوردستانێ بێ جوداهى ل زاخو تاكو خانه‌قین دئێك سه‌نگه‌رو چه‌په‌رادا خوینا خو گورى وه‌لاتێ خو بكه‌ن و دڤێ رێكا پیروزدا ب هزاران قه‌هره‌مان و سه‌ركرده‌ و كادر پێگه‌هشتن و بونه‌ سه‌ر كێشێن شوره‌شێ.

 وڤێ شوره‌شێ وه‌ك باوه‌ریه‌كا نه‌گوهور كوردستان كره‌ مەلبه‌ندێ پێكڤه‌ ژیانێ و لێبورینێ ل ناڤبه‌را هه‌مى ئول و نه‌ته‌وا و بو جهێ ڤه‌حه‌واندنا ئازادیخواز و خه‌باتكه‌رێن عێراقێ ژهه‌مى پێكهاتێن گه‌لێ عێراقێ، دیسان ئه‌ڤ شوره‌شه‌ شیا گه‌له‌ك ده‌ستكه‌فتێن دیروكى بده‌ستڤه‌ بینیت وه‌ك رێككه‌فتنا (١١ى ئادارا ١٩٧٠)ێ، بێ گومان شوره‌شا ٢٦ی گولانا نیشتیمانى و پێشكه‌فتنخواز و سه‌رهلدانا بهارا سالا ١٩٩١ ژى هه‌ر درێژى دان بویه‌ ب شوره‌شا ئه‌یلولا مه‌زن و ئه‌ڤ ده‌ستكه‌فتێن ئه‌ڤرو ژى كو خو دناڤا سه‌ربه‌خویا كوردستانێ دا دبینین و به‌رهه‌مێ وێ په‌رله‌مان و حكومه‌ت و سیسته‌مێ دیموكراتیه‌تێ ل كوردستانێ ڤه‌رێژ و به‌رهه‌مێ ڤێ شوره‌شا مه‌زن بویه‌.

ئەڤرو وەک تەمامکەرا شورەشا ئەیلولێ و تەڤایا شورەش و بەرخودانێن گەلێ مە و بو گەهشتن ب خەونا شەهید و پێشمەرگە و هەمی پێکهاتنا بریارە گەلێ مە ل ٢٥ی ڤێ مەهێ د کەرنەڤالەکێ بێ وێنەدا ل پروسا ریفراندومێ دەنگ ب بەلێ بدەن ژبو دەولەتا کوردستانێ.

دوباره‌ پیروزه‌ ئه‌ڤ بیرهاتنه‌ و سلاڤ بو گیانێ پیروزێ ته‌ڤ شه‌هیدێن كوردستانێ و سه‌ركاروانێ شه‌هیدان بارزانیێ نه‌مر و ئیدریسێ هه‌رده‌م ساخ و هه‌مى پێشمه‌رگێن قاره‌مانێن شوره‌شا ئه‌یلولێ و سلاڤێن بێ سنور ل پێشمه‌رگه‌ و پارێزڤانێن وه‌لاتى ئه‌وێن ل به‌روكێن شه‌رى دژى تیرورستێن (داعش)دجه‌نگن، ... بەلێ بو ریفراندوما سەربخویێ .. بەلێ بو دەولەتا کوردستانی.

 

                                لقێ ١٨ ی پارتی دیموکراتی کوردستان

                                                  ١١/٩/٢٠١٧          








كومێنت (0)

  هه‌می مالك دپێتڤینه
ناڤ  
ئیمێل  
ده‌ق  
ده‌قێ نڤێسینێ دڤێت ژ ١٠٠٠ پیتا پتر نه‌بن - پیت یێن ماین