2017-08-16 11:23:17 | ژمارا خاندنا : 555 | كومێنت : 0 |

عمر ئورەیی: سوزێ ددەینە شەهید (عبدالله) و تەڤایا شەهیدان بەردەوام بین لسەر رێیا وان تا دەولەتبوونا کوردستانێ یان دگەهینە کاروانێ وان



ب بەرهەڤبوونا هژمارەکا بەرپرسان و مالباتا شەهیدی و جەماوەرەکێ زور، درێورەسمەکێ ژ هەژی دا ل سەنتەرێ ناحیا چەمانکێ پەردە لسەر وێنێ شەهیدێ قارەمان (عبدالله سیاری)هاتە لادان لروژا دوو چارشەمبی رێکەفتی ١٦/٨/٢٠١٧.

ب ئامادەبوونا رێزدار (عمر ئورەیی) بەرپرسێ لقێ ١٨ یێ پارتی دیموکراتی کوردستان و (اسماعیل مصطفى) قایمقامێ قەزا ئامێدیێ هژمارەکا بەرپرسێن میری و حزبی و لەشکەری و پەرلەمانتار و کەسایەتی و ریسپیێن دەڤەرێ و مالباتا شەهیدی، ل سەنتەرێ ناحیا چەمانکێ رێورەسمەک ژ هەژی برێڤەچوو ژبو لادانا پەردێ لسەر وێنێ شەهیدێ قارەمان (عبدالله سیاری) و رێورەسمان ب خولەکەک بێدەنگ راوەستان رێزگرتن بو گیانێ پاکێ شەهیدان دەستپێکر، ل د ویڤدا چەند ئایەتک ژ قورئانا پیروزهاتن خواندن.

هێژا عمر ئورەیی بەرپرسێ لقێ پەیڤەک پێشکێشکر و تێدا باس ل قارەمانیا ڤی شەهیدی و خەباتا گوندێ سیارێ کر، دیسان باس ل خەباتا درێژا گەلێ کورد کر ژبو ئازادی و سەربخویێ.

و ل خارێ دەقێ پەیڤا بەرپرسێ لقێ هاتیە بەلاڤکرن.

دیسان چەند پەیڤێن دی هاتن پێشکێش کرن ژوان پەیڤا بنەمالێ و پەیڤا هێزێن زێرەڤانی ژ لایێ لیوا (سالار) ڤە و پەیڤا ئەنجومەنێ گوندێ سیارێ ژلایێ نیهاد سیاری و پەیڤا لیژنا بەرهەڤکارا وێنەی و رێورەسمان ژلایێ مقەدەم رەمەزان سیاری ڤە هاتە پێشکێش کرن.

ل دویڤدا هژماەرکا هەلبەستان هاتن پێکێشکرن و ئێک ژ وان یا کچا شەهیدی بوو.

و ئەڤا ل خارێ دەقێ پەیڤا هێژا (عمر ئورەیی) بەرپرسێ لقێ ١٨ یە:-

 

بناڤێ خودایێ مەزن و دلوڤان

 

 

-. ئامادەبوویێن هێژا ...

- پەرلەمانتەر و ئەندامێن ئەنجومەنێ پارێزگەها دهوکێ ...

- کەسایەتی و رهسپی و خەلکێ برومەتێ دەڤەرێ ...

-. خەلکێ گوندێ سیارێ یێ خوراگر ...

- مالبات و کەس وکار و هەڤال و هەڤچەپەرێن شەهیدی ...

-. مێهڤانێن قەدرگران یێن ژ جهێن جودا جودا هاتین.

-. پێشمەرگێن قارەمان ...

-. کادرێن حزبی ، حکومی ، لەشکەری .....

- ئێڤار باش، هوین هەمی بخێرهاتن لسەر سەران و لسەر چاڤان.

ئەم ئەڤرو لڤێرە خرڤە بووینە داکو بشانازی ڤە پەردێ ل سەر وێنێ ئێک ژ  پێشمەرگێن قارەمان.

ئێک ژ  هەڤدوز و هەڤچەرپەرێن خو، ئێک ژ سەرکردێن لەشکەری یێن چاڤنەترس راکەین، ئەوژی لیواء (عبدالله یوسف سیاری) یە.

بەرێزان  ........  ل دەمێ ناڤێ گوندێ سیارێ دهێتە گوتن، ئێکسەر - مێرانی ، قارەمانی ، چاڤ نەترسی و دوژمن بەزینی دهێتە سەر هزرا مروڤی، بەلێ (عبدالله سیاری) ژی ئێک ژ وان قارەمانێن هەرە دیار و بەرنیاس بوو.

 شەهیدبوون ل دەف خەلکێ گوندێ سیارێ سەربلندی و سەرفەرازیە ... چونکە:

-  خەلکێ ڤی گوندى بدرێژیا دیروکا بزاڤا رزگاری خوازا کوردی پشت و پەنا بوویە بو شورەشان.

- لدەمێ هێرشێن دوژمنا دهاتنە سەر کوردستانێ خەلکێ ڤی گوندی بمێرانیەکا بێ وێنە لسەنگەرێت پێشیێ بوون.

-. چونکە شەهید (عبدالله سیاری) نە شەهیدێ ئێکێ یە ڤی گوندی، بەلکو کومەکا قارەمانان کرینە قوربانی ئاخ و دوزا وەلاتی.

رێزداران   ...    شەهید (عبدالله سیاری) لسالا (١٩٦٣) لگوندێ سیارێ دهێتە سەر دونیایێ و  لسالا (١٩٨٥)ێ بفەرمی دبیتە پێشمەرگە لسنورێ ل .ن شێخان ل شورەشا گولانێ.

 پشتی ئەنفالێن رەش شەهید (عبداللە) ژی وەکو زور ژ هەڤالێن خو یێن پێشمەرگە وکادرێن پارتی سەر وان کاودانێن دژوار یێن بسەرێ گەلێ مە هاتین ژ خو ناگریت خو بو دوژمنی ب چەمینیت بەلکو رێکا ئاوارەیێ و نەداریێ و چارەنڤیسەکێ نەدیار دهەلبژێریت و ل ئیرانێ دبیتە پەنابەر.

 ل سەرهلدانا گەلێ کورد شەهید (عبدالله) دگەل هێزێن ئێکێ یێن پێشمەرگەی قەستا کوردستانێ دکەت ژبو پشتەڤانیا خەلکێ سەرهلدایی، ئێدی بەردەوامیێ ب پێشمەرگاتیێ ددەت، ژبەر زیرەکی و قارەمانی و رەوشت بەرزیا وی چەندین پلەیێن لەشکەری وەردگریت.

دگەل هاتنا هێزێن رەشێن تاریێ بو کوردستانێ ئێدی شەهید (عبدالله) پتر دیار دبیت ، دبیتە ئێک ژ قارەمانێن هەرە دیار ، پتر لقادا شەری دیار دبیت ، دبیتە سەرکردەکێ مەیدانی.

بەرێزان   ...   شەهید ئەو گەشە ناڤێ پیروزە کو هەمی مروڤایەتی شانازیێ پێ دبەت و دخوازن ببن خودانێ ڤێ ناسناما پیروز ، چ مللەت ب ئارمانجێن خو شاد نابن ئەگەر خوبەخشکرن و قوربانیدان نەبن.

لەوما شەهید (عبدالله سیاری) ژی ئەڤ ناسنامە بو خو هەلبژارت و لروژەکا وەکو ئەڤرو کو گەشترین روژە د دیروکا گەلێ مەدا ... کو روژا ژ دایک بوونا پارتی و سەروک بارزانی یە، ئها دڤێ روژێدا دا خو بو ئارمانجێن پارتیا خو کریە قوربان.

رێزداران ...   بێ گومان راکرنا پەردێ لسەر وێنێ شەهیدێ قارەمان گەلەک بها و رامان هەنە بەلێ لڤێرە مەرەما مە تەنها و تەنها بو وێ چەندێ یە داکو بێژینە ڤی شەهیدی و هەڤالێن وی یێن شەهید ..  چ جاران هەوە ژبیر ناکەین، هوین هەردەم دێ دناڤا وژدانا مەدابن.

ئەم بناڤێ لقێ ١٨ یێ پارتی دیموکراتی کوردستان سوزێ ددەینە شەهید (عبدالله سیاری) و تەڤایا شەهیدان کو بەردەوام بین لسەر رێکا وان هەتا یان دگەهینە کاروانێ وان یێ سەربلندیێ یان ئەو نەخشەرێیا بو جانێ خو دانای جێ بەجێ بکەین ئەوژی دەولەتبوونا کوردستانێ یە.

ل دوماهیێ دبێژین ... سلاڤ ل خوینا گەشا شەهید (عبدالله سیاری) و تەڤایا شەهیدێن کوردستانێ و سەوەرێ شەهیدان بارزانیێ باب و ئیدریسێ جانەمەرگ.

ئێدی بژی کورد ... بژی کوردستان ... بژی سەروک بارزانی ئومێدا دەولەت بوونێ.

         .... زوور سوپاس ....

                                                                                                                          لقێ ١٨ (پ. د. ک)

                           ١٦/٨/٢٠١٧








كومێنت (0)

  هه‌می مالك دپێتڤینه
ناڤ  
ئیمێل  
ده‌ق  
ده‌قێ نڤێسینێ دڤێت ژ ١٠٠٠ پیتا پتر نه‌بن - پیت یێن ماین