2017-08-10 03:47:54 | ژمارا خاندنا : 244 | كومێنت : 0 |

عمر ئورەیی: ب وەغەرکرنا کاک (زبیر) پارتی کادرەکێ خو یێ چالاک و دلسوز ژ دەست دا



کانیکا، ئاهەنگا ماتەمینیا چلەیا بەرپرسێ لژنا بامەرنێ هاتە گێران

 

ب بەرهەڤبوونا هێژا (عمر ئورەیی) بەرپرسێ لقێ هەژدە یێ پارتی دیموکراتی کوردستان و هژمارەکا بەرپرسان و مالباتێ و خەلکێ دەڤەرێ، ب هەلکەفتا بورینا (٤٠) روژان لسەر وەغەرکرنا خودێ ژێ رازی بەرپرسێ لژنا ناوچا بامەرنێ ئەڤرو ١٠/٨/٢٠١٧ ئاهەنگا ماتەمینی ل هولا بیرەوریا لگوندێ کانیکا هاتە گێران.

رێورەسمان ب خولەکەک بێدەنگ راوەستان رێزگرتن بو گیانێ شەهیدان و سەرکاروانێ وان بارزانیێ نەمر و ئدریسێ هەردەم ساخ دىستپێکر، ل دویڤدا پەیڤا لقێ١٨ ژلایێ هێژا (عمر ئورەیی) بەرپرسێ لقێ ڤە هاتە پێشکێش کرن و تێدا ئاماژە ب کەسایەتی و خەبات و دلسوزی و لێهاتیا خودێ ژێ رازی کر وباس ل چەند قوناغێن گرنگێن ژیانا وی کر. و ل خارێ لداویا ڤی نوچەی دەقێ پەیڤا هێژایی هاتیە بەلاڤکرن.

ل دویڤدا پەیڤا بنەمالێ هاتە پێشکێشکرن و تێدا سوپاسیا بەرپرسێ لقێ و هەمی ئامادەبوویان کر و سوزدان دبەردەوام بن لسەر وێ رێبازا کاک زبێر لسەر چووی کو رێبازا پارتی و بارزانی یە، و پاشی هژمارەکا هوزانان ژ لایێ هەلبەستڤان (هشیار رێکانی) و چەندێن دی هاتن پێشکێشکرن.

ل داویێ ئامادەبوویان ب رێپیڤان قەستا گورستانێ کر و ژ لایێ هەردوو بەرێزان بەرپرسێ نوکە یێ لقێ و یێ بەرێ تاجە گولینەک لسەر گورێ خودێ ژێ رازی هاتە دانان و دوعا بو کرن.

دهێتە زانین هەر ئێک ژ هێژایان (بیار دوسکی) و (رێناس جانو) پارلەمانتارێن سەر ب لیستا پارتی و (اسماعیا مصطفى) قایمقامێ ئامێدیێ و هژمارەکا رێڤەبەرێن دامودەزگەهێن میری و پلەدارێن لەشکەری و کارگێر و کادرێن لقێ١٨ و ل.ن. بامەرنێ ومالباتا خودێ ژێ رازی و خەلکێ دەڤەرێ بەرهەڤی ڤان رێورەسمان بوون.

و ئەڤا ل خارێ دەقێ پەیڤا رێزادا (عمر ئورەیی) بەرپرسێ لقێ١٨(پ.د.ک) ە.

بناڤێ خودێی مەزن و دلوڤان

       ئامادەبویێن هێژا ..... کەسایەتی و ماقویل و زانایێت ئاینی .. پێشمەرگەیێن قارەمان .. کادرێن حزبی و لەشکەری ... مێهڤانێن ژ جهێن جودا جودا هاتین ... مالبات و هەڤال و کەس وکارێن هەڤال (زبیر نجمان احمد کانیکی)، هوین هەمی بخێر بهێن لسەر سەران لسەر چاڤان.

ئەڤروکە ئەم لڤێرە خرڤەبووینە داکو چلەیا هەڤال و هەڤچەپەر و کادرێ خو یێ دلسوز و خەباتکەر (زبیر نجمان احمد) کانیکی ئەندامێ لقا مە و بەرپرسێ ل.ن بامەرنێ ساخ بکەین.

کاک زبیر لسالا (١٩٧١)ێ  و لڤێرە لگوندێ کانیکا هاتیە سەر دونیایێ، ژبەرکو دەمێ خودێ ژێ رازی ژدایکبووی ئها لوی دەمی بابێ وی یێ رەحمەتی و چەندین کەس وکار و گوندیێن وان پێشمەرگێن شوەرەشا مەزنا ئەیلولێ بوون، لەوما هەر زوی هێشتا دژیێ گەنجینیێ دابوو، هەمی هیڤی و ئومێدێن وی ببون ئەو کو روژەکێ مەزنبیت و ئەوژی وەکو بابێ خو ببیت پێشمەرگە و بەرەڤانیێ ژ مافێ مللەتێ خو یێ ستەم لێکری وبن دەست بکەت.

لەوما لسالا (١٩٨٧)ێ مالباتا وی زور ژ گوندی و کەس و کارێن وان بریارەک بکوم ددەن پێکڤە قەستا رێزێت شورەشا گولانێ دکەن و ئەوێ بشێت تڤەنگێ هەلگریت دبیتە پێشمەرگە.

 ل ئەنفالێن رەشێن سالا (١٩٨٨)ێ دیسان ئەو و کەس وکارێن خو بریارێ ددەن رێکا ئاوارەیێ و درەبەدەریێ و نەداری و چارەنڤیسەکێ نەدیار دهەلبژێرن، رەت دکەن کو بەرڤ دوژمنێ خو بچن، دبنە ئاوارە ل کەمپێن تورکیا پاش دچنە ئیرانێ دوێ ژیانا نەخوشا ئاوارەیا ئیرانێ دا دمینن حەتا سەرهلدانا مللەتێ مە لسالا (١٩٩١)ێ دەست پێ دکەت و زوربەی وان دگەل هێزێن ئێکێ یێن پێشمەرگەی قەستا کوردستانێ دکەن داکو بەرەڤانیێ ژ خەلکێ سەرهلدای و ئاخا پیروزا وەلاتی بکەن.

-. کاک زبیر هەر ل هاتنا وی بو کوردستانێ دبیتە پ.م و پشکداریێ دهەمی وان شەرا دا دکەت یێن لسەر مە هاتینە سەپاندن و دژی خەلکێ مە هاتینە کرن.

و دیسان ل دەمێ هێزێن رەشێن تاریێ ل سالا (٢٠١٤)ێ ڤیاى کوردستانێ داگیر بکەن و خەلکێ وێ ژناڤ ببەن، کاک زبێر ژی وەک هەر کادرەکێ پارتی چەک هەلگرت و بەرەڤ سەنگەرێت بەرەڤانیێ  چوو.

-. لسالا (١٩٩٨)ێ دبیتە کادرێ پارتی لسنورێ ل.ن. ئامێدیێ و بەردەوامیێ بکارێ پارتایەتی دکەت.

-. لسالا (٢٠٠٥)ێ پشتی دامەزراندنا لقا١٨ دهێتە ڤەگوهاستن بو لژنا ناوچا سەرسنکێ ژبەر کارو چالاکیێن وی یێن بەردەوام دهێتە هەلبژارتن وەک ئەندامێ ل.ن سەرسنکێ.

-. پشتی کونگرێ سێزدێ یێ پارتی و ل کونفرانسێن نافخویی دهێتە هەلبژارتن وەک بەرپرسێ ل.ن. بامەرنێ، و کاک زبێر ل چەندین ناوچا بەرپرساتیا لیژنێن نافخو کریە وەک ل.ن. بامەرنێ ، چەمانکێ  و کانی ماسێ، و شیایە د ئەرک و کارێن خودا یێ سەرکەفتی بیت و دیسان بسەرەدەری و رەفتارێن خو یێت ژێهاتی شیایە جهێ خو ددلێ هەمی هەڤالێن خودا بکەت و هەردەم سەرەدەریا وی دگەل هەڤالێن وی سەرەدەریەک زور متواضع و ساخلەم بوویە لەوما دناڤ هەمی هەڤالێن خودا یێ خوشتڤی بوو.

بەلێ زور مخابن لروژا ٢٦/٦/٢٠١٧ ژ ئەنجامێ رویدانەکا هاتن و چوونێ گیانێ خو یێ پیروز ژ دەست دا.

ئەم بناڤێ لقا١٨ یا پارتی دیموکراتی کوردستان دوبارە سەرەخوشیێ ل مالبات و کەس وکارێن کاک زبێر دکەین، ب وەغەرکرنا کاک (زبیر) پارتی کادرەکێ خو یێ چالاک و دلسوز ژ دەست دا، هەڤخەمیا خو دوپات دکەین بو ژدەست دانا وی، و ژ خودایێ دلوڤان دخازین ب بەهەشتا بەرین شاد بکەت و هەدارێ بدەتە هەمی لایەکی و مزگینیا خێرێ بدەتە مالباتا وی هەروەک دڤێ ئایەتا پیروزدا دبێژیت:

(وَبَشِّرِ الصَّابِرِينَ الَّذِينَ إِذَا أَصَابَتْهُم مُّصِيبَةٌ قَالُواْ إِنَّا لِلّهِ وَإِنَّا إِلَيْهِ رَاجِعونَ) صَدَقَ اللهُ العَظيم.

                                                          لقێ ١٨

                                                پارتی دیموکراتی کوردستان

                                                       ١٠/٨/٢٠١٧








كومێنت (0)

  هه‌می مالك دپێتڤینه
ناڤ  
ئیمێل  
ده‌ق  
ده‌قێ نڤێسینێ دڤێت ژ ١٠٠٠ پیتا پتر نه‌بن - پیت یێن ماین