2017-08-06 05:38:46 | ژمارا خاندنا : 2315 | كومێنت : 0 |

ئاریشەکا جڤاکی هاتە چارەسەرکرن



عمر ئورەیی: پارتی هەردەم خو ل ئاریشێن خەلکێ خو کریە خودان و هەردەم داگێران ژ مافێن خو کریە داکو ئێکرێزی و تفاقا مللەتی بپارێزریت.

ب ئامادەبوونا هێژایان عمر ئورەیی بەپرسێ لقێ١٨ یێ پارتی دیموکراتی کوردستان و  (اسماعیل مصطفى) قایمقامێ قەزا ئامێدیێ و کارگێرێن لقێ و کەسایەتی و ریهسپیێن دەڤەرێ و هەردوو مالباتێن خودانێن ئاریشێ، رێورەسمێن چارەکرن و ب دوماهیئینانا ئاریشەکا جڤاکی لهولا سەنتەرێ رەوشەنبیری یێ ئامێدیێ لروژا ئێکشەمبی رێکەفتی ٥/٨/٢٠١٧ برێڤەچوون.

رێورەسمان ب خولەکەک بێدەنگ ژ پیانڤە راوەستنا رێزگرتن بو گیانێ شەهیدان دەستپێکر و ل دویڤدا رێزدار بەرپرسێ لقێ پەیڤەک پێشکێشکر و تێدا باس ل هەبوونا ئاریشا و رولێ پارتی و کەسایەتیان و بنەمالان د چارەسەریێ داکر و ل خارێ تەمامیا پەیڤا هێژایی هاتیە بەلاڤکرن.

ل دویڤدا پەیڤەک ژ لایێ خودانێن ئاریشێ هاتە پێشکێشکرن و بەرهەڤییا پێکهاتنێ ژ لایێ بەرپرسێ لقێ و قایمقامێ ئامێدیێ و هەردوو مالباتا و چەندین کەسایەتیان وەک دیدەڤان هاتە ئیمزاکرن و ل ئێکو دوو خوشبوون وبریارە هەردوو مالباتا هەڤدوو مێهڤان بکەن.

دهێتە زانین ئەڤ ئاریشە دناڤبەرا دوو مالباتا بویە ژ هەردوو گوندێن بێبادێ و بێرکیات یێن سەر ب ناحیا چەمانکێ کو کەسەک بەری (٩) سالان هاتیە کوشتن و کوژەک نها د زیندانێ دایە.

 

و ئەڤا ل خارێ دەقێ پەیڤا رێزدار عمر ئورەیی بەرپرسێ لقێ ١٨ (پ.د.ک) ە:

 

بسم الله الرحمن الرحیم

(إِنَّمَا الْمُؤْمِنُونَ إِخْوَةٌ فَأَصْلِحُوا بَيْنَ أَخَوَيْكُمْ وَاتَّقُوا اللَّهَ لَعَلَّكُمْ تُرْحَمُونَ)

                                                                    صدَقَ آلله آلعظيْم.

 

بەرێز جەنابێ قایمقامێ ئامێدیێ ....

ئامادەبووێن بەرێز ...

           کەسایەتی و ریهسپی و ماقولێن دەڤەرا ئامێدیێ هوین هەمی بخێر بهێن لسەر سەران و لسەر چاڤان.

   ئەڤرو ئەم لڤێرە ئامادەبووینە داکو پشکداریێ بکەین د چارەسەریا ئاریشەکا جڤاکی دا یا پەیدابووی لناڤبەرا دوو مالباتێت گوندێت بێرکیات و بێبادێ دا یێت سەر ب ناحیا چەمانکێ.

وەکو یا خویا ئاریشێن جڤاکی دناڤ زۆربەیا جڤاکێن ڤێ جیهانێ دا روی ددەن، بەلێ ژبەرکو جڤاکێ مە یێ کوردەواری جوداهیەکا تایبەت هەیە ژ جڤاکێن دی یێن ڤێ جیهانێ ئەوژی کوردستان هەر ژ کەڤندا و هەتا ئەڤرو مەلبەندێ پێکڤەژیانا ئولی و نەتەوەیی و لێبورین و ئێک دوو قەبیل کرنێ یە، لەوما ئەڤی کەلتورێ پێشکەفتی و پیروز کاریگەری ب ئەرێنی لسەر هەر تاکەکێ جڤاکێ مە یێ کوردی کریە.

لەوما دێ بینین لدەمێ ئاریشەک یان کێشەکا جڤاکی پەیدا دبیت، ب دەهان و بگرە بسەدان خێرخواز و کەسانێن دلسوز و جوامێر ژ هەمی چین و تەخێن جڤاکی بهەمی شیانێن خو بزاڤێ دکەن کو ڤێ ئاریشێ چارەسەربکەن و بئاریشا خو دزانن، خودانێن ئاریشێ ژی رێزەکا مەزن بەرێ خو ددەنە ڤان خێرخوازێن جامێر. زوربەی زوری جاران ژی خودانێن ئاریشا لسەر خاترا ڤان کەسان داگێرانی ژ مافێن خو دکەن، ڤان داخوازیا قەبیل دکەن.

  ژبو ڤێ ئاریشێ ژی چەندین کەسایەتی و رهسپی و ماقول و کادرێن پارتی ئەڤ ئاریشە بئاریشا خو زانی یە و شەڤ و روژ کرینە ئێک داکو ڤێ ئاریشێ چارەسەربکەن.

ژبەر ماندی بوونا وان و رێزگرتنا ڤان هەردوو مالباتا لوان، بناڤێ خودێ ئەڤ ئاریشە چارەسەر بوو و ئەڤروکە لڤێرە ئەڤێ رێککەفتنێ پیروز دکەین.

ئەم بناڤێ لقا ١٨ یا پارتی دیموکراتی کوردستان سوپاسیا وان هەمی کەسایەتیا دکەین یێن کو بڤی کارێ خێرخوازی رابووین. دیسان بگەرمی سوپاسیا هەردوو مالباتا دکەین کو رولێ باشیێ دیتی و ئەڤ ئاگرە ڤەمراندی.

ئەم ژی وەکو قوتابیێن رێبازا پارتی و بارزانیێ نەمر ئەم فێربوینە کو هەردەم خو لئاریشێت مللەتی بکەینە خودان و گیانێ ئارامی و ئێکرێزیێ و پێکڤە ژیانێ دناڤ خەلکێ خودا خورت بکەین و بپارێزین.

پارتی دیموکراتی کوردستان هەردەم دڤێ مەیدانێ ژی دا پێشرەوێ بێ هەڤرک بوویە،چونکە پارتی هەر ددەمێ ژدایک بوونێ ڤیایە و شیایە هەمی حزب و رێکخراو و کەسایەتی و ئەکادیمی و رەوشەنبیرێن وی سەردەمی کرینە ئێک و هێز و شیانێن وان د ئێک خیڤەت دا کومکرینە. لبن رابەراتیا سەروکێ نەتەوا کورد (مصطفى بارزانی).

 پارتی خو ل ئاریشێن خەلکێ خو کریە خودان و هەردەم داگێران ژ مافێن خو کریە داکو ئێک رێزی و تفاقا مللەتی بپارێزریت.

ئامادەبوویێن هێژا هوین د ئاگادارن ئەڤروکە ژ هەر روژەکێ پتر مللەتێ مە پێتڤی ئێک رێزی و تفاقێ یە، چونکە .....

ژ دەولەت سەرێ خوینا گەشا شەهیدێن مە و

قارەمانیا پێشمەرگێ چاڤ نەترس و

خوراگریا مللەتێ مەیێ دوژمن بەزین

ئەم یێت بەرەڤ قوناغا سەربەخویێ و ئارامیێ دچین.

و یا خویایە چەندین ئەم ل قوناغا دوماهیێ نێزیک دبین هێزێن رەشیێ و تاریێ و دوژمنێن مللەتێ مە پتر هاردبن.

لەوما ئەم ژی ئەڤروکە پتر پێتڤی ب ئێکرێزی و ئێکگرتنێ و تفاقێ نە.

زورا گرنگە ئەم ژی هەمی پێکڤە و ب ئێک دل و گیان و ئێک دەست بەرەف ریفراندۆمێ بچین و هەتا هەتایێ مللەتی ژ چەوساندن و سوتاندن و قرکرنێ خلاس بکەین.

ل دوماهیێ .....

بناڤێ لقا ١٨ یا پارتی جارەکا دی سوپاسی و دەستخوشیێ ل هەمی خێرخوازێن پشکداری کری دکەین.

زور سوپاسیا هەردوو مالباتا دکەین.

ئەڤێ رێککەڤتنێ ژدل پیروز دکەین.

ئەم پر ئومێدین هەردوو مالبات ژ ئەڤروکە وێڤە دێ وەک ئێک مالبات پێکڤە بژین.

هەر شاد و بەختەوەربن.

 

                                                                     لقا ١٨

                                                                   (پ.د.ک)

                                                                  ٦/٨/٢٠١٧








كومێنت (0)

  هه‌می مالك دپێتڤینه
ناڤ  
ئیمێل  
ده‌ق  
ده‌قێ نڤێسینێ دڤێت ژ ١٠٠٠ پیتا پتر نه‌بن - پیت یێن ماین